星期五，夜晚join埋阿超班教友，三十幾人一齊出海釣墨魚。七點半由西灣河出發，去到將軍澳對出個海灣開始食嘢釣墨魚。已往去親我都一定釣唔到嘢上黎，雖然今次又係釣唔到墨魚，但係反而就俾我釣到兩條魚上黎喎，一條唔知係乜種嘅細魚同一條牛鰍 (貼住海底黎游嘅扁身魚)，佢都真係唔好彩囉，咁都俾我釣到上黎。成船人釣得六條墨魚左右，反而釣到魚仲多，而Lawrence同其中一個教友分別各身釣咗條雞泡魚上黎添，好過癮呀！

 

星期六，帶埋啟山約咗Anita同秋秋食晚飯。原先約定五點半CWB等，但係阿妹成五點幾先帶啟山返到黎屋企，仲要阿仔原來冇乜瞓過晏晝覺。今次死啦，阿仔唔夠瞓就好易扭計，所以我都係帶定多D手指餅以防萬一。同阿仔搭巴士落CWB嘅時候，阿仔係咁摸其他乘客跟住就同佢地笑，攪到其他人都好鬼開心。三大一BB去咗火間土度食，一去到坐低，啟山就好開心咁係咁拍枱，初時都幾定嘅，但係當見到我地愈黎愈多嘢食，自己就未有得食嘅時候，佢就開始有D扭計喇，唯有出動手指餅，我一邊自己食，一邊就餵佢食。到夠鐘食奶嘅時候，好衰唔衰我帶去嘅熱水居然凍咗，唯有等侍應嘅熱水黎啦，但係阿仔見到個奶樽但係又冇得食嘅時候，佢唯有喊起黎啦。Anita原先話要試吓餵阿仔食奶，結果見到佢喊，最後都係縮沙，而秋秋就嘗試餵咗一陣，不過阿仔依然係喊，結果都係等我攪番啦。食完奶奶之後，繼續我邊食邊餵佢食吓餅仔安慰吓佢，學Anita話齋，我呢個舅父真係唔易做囉，邊食邊湊仔，攪到自己冇啖好食。不過佢都算唔係扭計扭得好犀利，都有同兩個姐姐玩吓影吓相。

 

食完飯離開出到街之後，阿仔就非常乖囉，任由兩個姐姐抱黎抱去，去完買嘢又去食埋雪糕都唔扭計，食完就同姐姐byebye。抱住佢行咗冇耐，佢終於都瞓著咗囉，完全交足戲俾人。

 

星期日，母親節。一早第一樣嘢幫阿媽做嘅就係幫佢做咗個「微創手術」，哈哈，原因係佢抱啟山起身嘅時候，唔知喺邊度拮咗條竹刺又攞唔番出黎，所以最後由我操刀。之後我同啟山同阿媽出去食早餐，到中午等阿妹出黎去搵位飲茶，佢今年開心啦，話晒第一次過母親節喎，可惜啟山仲未識係乜，當然乜嘢都冇得收啦。到夜晚得我同阿媽、阿妹同啟山約埋表哥同姨媽姨丈一齊出去食飯慶祝母親節，可能今晚好多人都趕返屋企睇大結局，包括我阿媽同姨媽在內，所以未夠七點都已經好多人。坐低後我就講咗句話：「今晚做阿媽嘅都唔駛辛苦！」，結果就係，我又一邊抱住啟山一邊食飯喇！