端午節，十點幾起身，望吓個天，又係天陰陰落雨嗰隻。跟住抱咗啟山出去大排擋食個早餐，然後又去睇玩具，揀揀揀，今次買乜俾啟山玩好呢？好！既然佢成日見我地講電話咁好奇，又想攞黎聽，就買個大電話俾佢玩啦。

 

晏晝阿妹佢地帶咗啟山返去佢阿嫲度食飯。我就同阿B(靈犬)沖涼，兼做咗件十年黎冇人夠膽做嘅嘢，就係同佢剪毛！雖然阿B啲毛從來都係自己自然更換，不過就成日都好似有隻雞毛掃喺度行黎行去，以前試過帶佢俾人修剪，結果都係剪唔成仲咬人添，自此就冇人夠膽打佢啲毛主意。但係我又真係想幫佢修剪吓，結果呢幾個月黎我去剪髮嘅時候，都會留意吓人地剪髮嘅手勢。於是今日同阿B一邊沖涼一邊同佢傾計，跟住就揸起把細交剪，手震震咁同佢剪吓一啲剪吓一啲。咦！冇事喎，雖然佢都係咁閃避，但係冇咬我喎，唯有一路開住啲暖水用花灑射住佢黎剪。同佢鬥智鬥力咗個幾鐘頭，終於都剪晒佢身上嘅長毛，完全精神爽利番晒，我亦都好安全咁出返黎。

 

吖！近排個MSN Spaces又做乜呢？點解個個人update完個blog都唔見粒星星出現嘅，咁鬼知邊個有update blog呢！