早排偉業兄問我有冇興趣去整甜品西餅，上四堂，咁我當然話冇問題啦，反正之前都學過，真係好好玩。跟住佢幫我報咗名之後話番俾我聽，我先知原來係喺佢教會度上堂，吖！我當堂覺得有啲奇怪，乜教會有咁多工具咩，不過冇所為啦。

 

好喇，咁今日第一堂，晏晝4點就上到去佢地教會，一入到去，就見到有三個焗爐同其他工具分別放晒喺三張長枱度，果然係堅架。咁有新朋友上到教會，好自然就會有人搵你傾計架，好正常啫，咁一傾之下，阿Ivy導師同我講，今日上堂十幾人得我一個係男性，問我介唔介意？我緊係話唔介意冇所為啦，但個心就諗，今次俾偉業跣咗添，初頭仲以為佢同Abey有份上，諗住同佢地一齊玩吓，點知…算！

 

好彩有幾個都認得我係偉業結婚嗰日嘅攝影師黎，都有啲嘢傾冇咁慘。人齊，上堂，今日整cookie，原來連Ivy導師都知我識整蛋糕，結果搵咗我做demo，叫其他組員睇我點樣將啲材料混合。而我嗰組其餘兩位女仕當然唔駛做呢啲粗重功夫啦，結果我地組好快就攪掂盤麵糊。我依然都係好enjoy整餅嘅過程同等待焗爐“叮”嗰一聲。

 

整好咗一大袋cookie，7點鐘離開教會，冇嘢做，知道阿媽去咗阿妹屋企打牌食飯，於是我又走咗上去。哈哈，上到去見到啟山坐緊車仔玩，緊係第一時間請佢食舅父親手做嘅餅啦，呢次係佢第一次食我整嘅餅，好開心食咗我一大塊，連比比都坐定定食咗成塊添。