眨吓眼，啟山依家已經八個月大囉。兩隻小門牙加上肥肥嘅面珠仔，好鬼可愛。不過依家上顎居然四隻牙仔一齊出黎，攪到佢早排都幾炆。上個禮拜仲帶佢去見個私家醫生檢查，不過醫生話佢超重咗兩磅呀，等阿妹仲話俾多啲嘢佢食添，依家要減肥呀！個醫生仲話阿妹：妳想要個肥BB定係要個健康嘅BB吖？

 

另外仔仔學嘢學得好快，個幾禮拜前先學識爬，但係依家就愈爬愈快，三秒就由床頭爬到去床尾。結果今日出事啦。食飯嘅時候，阿媽明明仲睇住佢喺床頭度瞓緊，點之三分鐘後，突然聽到有嘢跌落地聲，幾秒後就聽到仔仔喊，於是我飛身衝入阿媽房，原來仔仔喺床尾碌咗落地，手腳朝天，於是即刻抱起佢檢查一吓，冇乜事，只係額頭紅咗少少。佢喊咗一陣就收番聲當冇事，我地只好望住佢笑，跟住俾舊飯珠仔佢食，佢又開心番，真係有得食佢就乜都得。

 

事後我仲研究仔仔點樣跌落地，佢明明係爬去床尾，但佢喺地下時係面向天，佢地抱住仔仔睇住我案件重演都好好笑。

 

唉！下次小心啲啦，不過有邊個BB未跌過架，唔跌唔得大架嘛！