尋日我地幫Leo慶祝生日(不過佢真正生日係10號)，首先我、Leo、Suki、Bello同Yuki去咗睇「鬼域」。我係第一次睇彭氏兄弟嘅戲，我覺得非常唔錯，而且視覺效果營造得非常一流，用上好多低頻嘅音效，令到我嘅心跳加快，而且我又睇得投入，連自己都好似一齊進入咗個異空間咁。同埋領會到佢要表達嘅嘢，原來我地好多時真係會遺棄咗好多嘢連自己都唔發覺。

 

睇完戲我地就走咗去Time Sq金牛苑食飯，一去到發覺成間裝修過，由以前嘅中式越菜格局，變成依家嘅西式裝修，真係有啲好似格格不入咁。

 

食完飯戲肉黎啦，我地跟住約埋其他人去咗一間擁有180度維港景色嘅sky pud度慶祝。哈哈，呢次Leo真係慘囉，壽星仔梗係俾人隊啦，未夠一點就已經"屎"咗大半，連場季軍戰都未開波，佢已經冧咗要喺梳化度休息，反而我想醉就偏偏最清醒，真冇解。不過大家真係玩得好開心，相信Leo唔會忘記我地呢個party。