雖然我並唔係一個教徒，但係當知道有部遺失近1700年嘅福音書《猶大福音》驚世出土後，就一直好期待4月9日呢個日子嘅來臨。由細到大，每逢復活節都必會接觸到耶穌被釘十字架嘅故事，而當中最重要嘅一個人物就係出賣耶穌嘅猶大。而呢部福音書嘅出現，正正揭開咗一個不為人知嘅秘密：猶大並冇出賣耶穌，而係耶穌主動要求佢咁做......

 

噚晚國家地理頻道作全球首播「《猶大福音》記錄片」，因為我冇CableTV，所以約好莎朗去佢娘家度睇兼錄影。

 

喺呢日之前，我已經查問過我認識嘅基督徒朋友們，確實係冇呢部福音書。記錄片中主要講述咗呢部手抄福音書喺70年代經由一個農夫喺埃及一個墓穴無意中發現，輾轉流落到唔少人嘅手中，直至2000年被一個女古董收藏家發現，再找來具有唔同權威性嘅專家為呢本蘆葦紙手稿進行鑑定同修復，結果證實為西元三至四年嘅手抄本《猶大福音》，經過六年嘅時間，專家將呢部破碎嘅福音書好似砌圖咁續片續片砌回原位，正正喺今年年初先至完成並進行解讀，結果就發現一個驚人事實。猶大並冇出賣耶穌，只係耶穌吩咐佢咁做，而且記載咗耶穌對猶大私底下嘅一番話，顯示出猶大嘅地位有別於其他門徒......

 

呢輯記錄片確實值得我地去深思一番，基於我並非一個教徒，所以更加可以以一個開放同客觀嘅態度去睇呢件事。以當時嘅社會環境因素影響下，教庭嘅主教絕有可能只選取適合當時環境嘅福音書納入為主流書籍，而其他則視為異端物，結果影響咗事情嘅真確性。正因為科學鑑定嘅進步，迫使得天主教教庭亦曾經對外公開過話聖經內有部份內容並非事實。其實我地現時有好多事情所見到嘅所聽到嘅都唔代表佢係真嘅，因為我地始終都唔係第一身所知道的。《猶大福音》嘅出現確實會令到現今教會產生一輪爭議性嘅話題，但對於我一個門外人黎睇，聖經最初都係由人傳人以手抄方式咁傳頌過千年，當中亦有冇人抄漏或加減呢？而傳譯嘅過程亦有冇將原有嘅意思有所誤解呢？若果只堅持聖經內現有嘅說法為事實嘅真確，而唔以客觀嘅態度去睇睇其他嘅說法，我個人認為對真實嘅歷史確實係唔公平。

 

我地以前讀歷史時都遇過一啲錯誤史實架，以前西方嘅人認為地球係四方形黎，又話太陽係圍繞住地球黎轉架，而且仲係深信咗好耐過喎，你地都應該聽過架，但係隨住時間嘅變遷，科學嘅進步，呢啲以前嘅史實，依家我地咪覺得係笑話囉。

 

我地應該相信乜嘢？由自己去決定啦！

 

我個人認為.........................................應該為猶大平反！

 

P.S. 我已經將「《猶大福音》記錄片」錄製好，想睇可出聲！