自從開始照顧啟山以來，已經半年冇打過麻雀囉。噚日抱埋啟山再次去樹雄屋企玩，亦由於阿妹佢地噚晚亦喺大陸返黎，所以正好可以約定喺鐵道沿線進行“交收”。

 

半歲嘅啟山開始辨別身邊嘅人同環境，所以佢噚日都有啲唔適應經常喊，相比聖誕節時就忸計好多，所以我都係成日照顧佢為主，未有機會同四方城say hello。哈哈，個個望完啟山再望苗苗，都覺得有好大差別，苗苗只係細十幾日，我地啟山就大大件，苗苗就細細粒。

 

我地出去食完飯返黎都十一點，樹雄佢地諗住繼續打夜場，反正放假。由於阿妹之前打電話比我話架火車要十一點半先到深圳，所以亦曾考慮過不如我帶啟山返屋企，諗住餵埋佢食奶等佢瞓咗我先落場，點知十一點九正當我餵緊奶嘅時候，阿妹打黎話過緊關，於是就好趕咁等啟山食完啲奶，即刻攞起孭帶，由馬鞍山坐馬鐵落大圍等佢地。我去到大圍時，佢地先喺上水，此時啟山已經喺我胸前熟睡咗囉。為咗“交收”順利，於是我又轉上去沙田度等佢地，等咗十幾分鐘後，終於都喺火車上“交收”囉，去到大圍我又落番車轉馬鐵返樹雄屋企，返到去已經係一點幾囉，終於時隔半年，再一次同樹雄張麻雀枱say hi啦！我地一打就打到朝早五點半，結果我都係輸咗幾十蚊。我返到灣仔時差唔多六點半，諗住去麥記食埋個早餐先，點之原來麥記仲未開，算啦！返到屋企煮咗碗麵食，沖埋個涼先瞓，瞓到晏晝三點幾先起身，呵呵……