九個月前，只得個半月大嘅啟山好唔好彩患上尿道炎，雖然只係一個好短嘅療程就好番晒，但係亦都需要經過一個長時間，然後進行一次腎掃描先可以file close。

 

唔經唔覺就已經過咗九個月喇。今朝一早就整醒仔仔，食埋奶奶，我同阿妹準時九點鐘帶仔仔去到東區醫院辦理入院手續。上到去日間護理病房第一件事又係磅重量血壓，磅完重個醫生就話仔仔超咗磅喎，問平時食幾多嘢呀？要減磅喎。其實都係超咗少少啫，佢已經瘦咗啲架啦。之後個醫生又同個姑娘講，呢個BB有啲麻煩喎，哦，原來佢地話仔仔因為好大隻，啲肉又厚，所以會比較唔容易搵到條靜脈插粒黃豆仔( 靜脈注射針頭 )。然後佢地就抱咗仔仔入去房仔度，等咗一陣，就聽到仔仔喊喇，應該已經插好黃豆仔喇。佢地一打番開度門，見到一隻好大嘅綠色八爪魚公仔放咗喺仔仔隻腳度，上身就俾張被圍住，真係好好笑，好似人地搵嘢綁住啲癲佬咁，因為仔仔真係好大力架，我仲問番個姑娘有冇俾仔仔踢親。跟住咪又係一條手指餅就氹番掂佢。

 

差唔多十一點鐘，阿妹就陪仔仔過去放射治療部度注射顯影劑，半個鐘頭後先返番上黎，原來佢喺嗰邊又引到唔少姑娘同佢玩。返到上黎之後，姑娘話要開始禁食，等到晏晝兩點去做掃描，同埋唔好俾佢瞓，掃描前會有藥俾佢食令佢容易瞓著，如果依家瞓咗到時佢唔瞓就大件事。就係咁，仔仔呢段時間真係慘，朝早未夠八點就俾我地整醒同食奶，依家要等到做完掃描先可以再食嘢，真係餓死佢囉，仲有佢又眼瞓，又唔可以俾佢瞓，喺肚餓同眼瞓嘅夾攻之下，佢只好口水鼻涕都一齊黎咁喊，結果連個姑娘都唔忍心，請咗兩塊餅仔佢食等佢止吓餓，多就唔得喇。跟住另一個姑娘又攞咗架車仔出黎俾佢坐，就係咁，我就推住仔仔喺個病房度走黎走去，佢就開心囉，我條腰骨就攰囉，連個姑娘都問，阿舅父你需唔需要休息一吓先呀？跟住有個醫生又黎同佢玩，佢又玩得鬼咁開心，又錫個醫生，完全已經忘記咗眼瞓同肚餓呢回事。

 

好唔容易終於都玩到點半鐘啦，姑娘攞咗兩支藥黎俾佢食，其實好明顯就係鎮靜劑黎，食完冇耐，未過到去放射治療部度佢已經瞓著咗。兩點鐘，正式做核掃描，仔仔就趴喺部核掃描機張床度，十足一隻乳豬仔放喺隻碟度咁，個放射技師叫我地留一個人坐喺度睇住佢，於是我就留底，阿妹就喺出面等。不過呢個時候，我就有樣嘢要問清楚嗰兩個放射技師，因為我係喺冇任何保護之下正正坐係部核掃描機隔離，係直頭可以摸住仔仔同個核放射頭嗰隻，而佢地就喺個屏風後面操作，好在佢地話其實個輻射量係好輕微，比起坐飛機仲要少好多，只係佢地日日都喺度咁做，所以先要保護得多啲，所以我都放心晒同仔仔一齊對住部機。個掃描做咗45分鐘，換咗兩個唔同嘅放射頭，一路睇住仔仔同成個過程運作，到最後望住個屏幕見到仔仔嗰兩個腎嘅立體影像覺得好得意，第一時間就諗起街市豬肉檔嘅豬腰，哈哈，又好似兩粒放大咗嘅蠶豆，哈哈。

 

三點左右返番上病房，姑娘話可以拍番醒佢就走得，但係我同阿妹都仲未食嘢，姑娘叫我地去食嘢先，佢話幫我地睇住佢。食完嘢返黎佢當然係未醒啦，今日嘅情況，佢瞓到六點都得呀，於是就突登抱醒佢，哈哈，佢完全係全身軟晒冇力，對眼開得三份一，個樣好好笑，連啲姑娘都忍唔住，最衰冇影底佢個樣，十足個醉酒佬一樣。跟住個姑娘攞樽奶黎嘅時候，佢對眼當堂發光一樣，完全醒晒，不過都係全身冇力。食埋個奶奶之後，仔仔就舉起手同班姑娘bye bye離開。而個報告就等到廿一號返黎睇就知道佢個腎有冇因為上次嘅尿道炎而影響到有花痕。

 

仔仔經過一日嘅疲勞，今晚實在瞓得特別耐，瞓得特別好。