早排因為睇咗一個日本電視節目「全能住宅改造王」之後，被節目內嘅音樂所吸引到，繼而知道原來呢個節目係出咗隻OST，同一本記錄咗部份有特式嘅住宅資料嘅書，之後搵過好多CD鋪同日本書店都搵唔到，又試過托CD鋪同住喺日本嘅朋友都係冇結果。最後，我終於嘗試利用網上購物嘅方式黎尋找，結果終於都俾我喺日本嘅amazon.com度搵到，真係好開心。呢次係我第一次透過網上喺海外購物，原來真係好方便。

 

等咗唔駛一個禮拜，呢隻"松谷卓~Before After"嘅CD終於喺今日由日本送到黎我手上啦，而本書就要過多一個禮拜左右先到，好開心呀！其實喺搵呢隻CD嘅期間，發覺原來我一早就聽過佢嘅作品，只係之前冇留意到啫。原來多套感人電影「在世界中心呼喚愛」、「藉著雨點說愛你」、「Touch」…嘅電影配樂都係由佢所創作，所以之後我再次搵番黎聽，特別係「藉著雨點說愛你」隻OST，真係非常好聽！佢嘅作品係以簡單自然嘅鋼琴為主，而今次再次吸引到我嘅"Takumi~匠"，就係以簡單嘅旋律，令到我喺欣賞嘅過程中感受到有一種溫暖嘅感覺。

 

	松谷卓~Before After

 

自以前迷上日本音樂大師喜多朗之後，松谷卓就係我所認識而迷上嘅第二位日本作曲家，希望日後可以繼續聽到多D佢嘅作品啦。