尋日係阿Sum同Maggie大婚嘅日子，非常開心。我亦忙於我所負責嘅拍攝事項，而中秋晚亦冇出外，仍然留喺屋企繼續做野，仲通頂做到到天光添。一到清早，明知應該冇乜時間食野，就拿拿聲煮個麵食，跟住就飛的過去Maggie屋企。由於時間緊迫，玩新朗嘅情度比預期中輕鬆，況且我地呢班兄弟又點會咁易俾班姊妹玩度吖。

 

其實整日嘅安排都幾緊湊，亦出現過小許阻滯，不過總算一切順利，只係時間上出現少許延誤。到咗夜晚，相信最高興就係一班Mic記嘅Sales，佢地嗰幾枱簡直係危險地帶，只要俾佢地揀中目標，就俾人倒酒撕片，攪到全場最哄動就係佢地，十足Mic記annual dinner咁，而最大目標就梗係阿廢紙先生而唔係阿Sum啦。而今次婚禮上，我覺得最特別之處，就係莫過於有好多相機(係Pro嗰隻)出現，十足好似做緊記者招待會咁，佢地睇相都有排睇囉。

 

做完晒野，收好器材，先同阿Sum同其他兄弟飲第一杯酒。可能真係太攰啦，返到屋企，放番好啲器材後，涼都未沖就坐咗喺張凳度瞓著咗，一瞓瞓到四點幾先上返床度瞓過，攪到頸都痛。尋日辛苦咗一日，今日成日都死瞓抖吓。

 

阿Sum同Maggie今日開始又進入一個新階段啦，喺度都再次送上祝福俾佢地啦！