今日仔仔一歲生日啦，好開心呀！一早就蒸咗個饅頭俾佢當壽飽食，之後又有紅雞蛋。今晚我地全家去咗CWB食街間香辣屋度食飯，而我就預先去Haagen-Dazs度攞之前訂咗嘅生日蛋糕。仔仔今晚著得好醒目呀，成晚都吸引唔少侍應同其他枱嘅食客同佢玩，有個侍應仲抱咗佢過隔離間西班牙餐廳度攞波波玩，仲有仲俾阿仔撞到個又係今日生日黎慶祝嘅靚姐姐添，咁當然佢又俾人抱著啦，真係艷福無邊呀！

 

我地不停講返上年同一時間大家嘅感受，而阿妹嘅感受就當然大啦，大家都記得佢經歷咗超過六十個鐘頭嘅痛楚都仲未生到阿仔出黎，結果最後都係要開刀。一到9點16分，阿妹就同阿仔講：「阿仔，你出世啦！」跟住我地就開始切蛋糕啦，阿仔好心急，蠟燭都未吹熄，就急不及待要食個蛋糕，跟住又成個頭舂埋去個蛋糕度就咁咬，整到成面都係雪糕，真係笑死。而我地今日個個都冇特登買禮物俾佢，因為平時都買開，而且仔仔只係對食有興趣，所以大家都好有共識咁個個都俾封大利是佢，返到屋企就等佢放落佢個大奶樽錢罌度。就係咁，阿仔就渡過咗佢嘅一歲生日喇。

 

留待出年兩歲嘅時候，我地就會同佢喺麥記度開party，到時佢應該有好多朋友仔，而且又識講嘢，出年實更加熱鬧啫！