今年嘅「挑戰12小時」越野馬拉松賽尋日又終於舉行完畢啦，不過今年嘅成績又比上年慢咗，用咗9小時44分17秒完成，但係我就冇失望到，原因係尋日嘅個天氣確實唔係太好。朝早準時8點10分，我地公開組喺油塘正式起步出發，不過起步冇耐，個天就開始落雨，幸好唔算大而且只落咗一陣，不過已經可以影響步行速度。

 

11點左右到達咗大老山，當時山度已經好大寒霧，能見度大概只剩番50米左右，而且都比較清涼。到咗12點幾，當時已經過咗獅子亭嘅Check Point，正處於引水道緩跑徑前往九龍水塘嘅路段中，個天又落雨啦，今次就比較大，而且都落咗好一段時間，就算成身濕都只好繼續上路。整日嘅濕度都好高，喺樹林入面更甚，身上嘅濕氣亦唔輕易散走，有啲辛苦。而因為落過雨嘅關係，往後嘅路段都唔係咁輕易走，可以跑嘅地方，啲泥全部濕晒，啜住隻腳。而我速度最快嘅落山路段，亦都因為全部變得濕滑而令我唔敢加速，只好小心翼翼。過埋鉛礦坳最後一個Check Point，走埋最後一段嘅落山山路，用埋最後嘅力氣一路向大埔佛教慧遠中學嘅終點跑去，終於大概5點50分左右跑到返終點。好攰，真係好攰，雙腳已經唔屬於自己，直至等埋張證書先至離開。

 

	完成賽事

	9小時44分17秒

 

返到屋企就即刻沖個涼食個麵，就走上床瞓，成個人散晒。今日雙腳仲好酸痛添，而啲腳趾因為承受唔少衝力而瘀咗添。已經連續參加咗五年，雖然每次都係好辛苦，不過只要我有能力，就會年年都參加！