今朝一早，應該都未夠8點，突然聽到樓下有街坊大叫：「火燭呀！好大火呀！」於是即刻起身，走去窗口度一望，就知道並非小事，只知係樓上三樓出事，於是即刻叫醒其他人之後就走咗上三樓睇睇，一上去就見到單位個阿婆企喺樓梯口度喊住係咁講：「冇啦冇啦，乜嘢都燒晒啦！」當時阿屋企度大門冇閂到，我見到佢入面間房個窗口位已經燒得好犀利，由窗簾燒到上天花，而且開始有好多煙，於是我即刻閂番佢棟大門，阻止燶煙踴出，然後拍打其他單位叫其他人疏散，當時仲未有消防黎到，又落返去自己屋企再打一次999，然後就聽到消防到咗，跟住即刻抱住仔仔同帶埋阿公落樓，諗住落到樓下等仔仔同阿公安全後先再返上去一次，點知落到去已經俾警察截住，要企埋一邊登記，冇得返上去。結果窗又冇閂，電腦又未熄，咁咪出事囉！火警單位就係我地隔離嘅樓上，睇住啲消防係咁射水，我啲電腦又近窗口，今次仲唔死。喺樓下再同街坊借電話通知阿媽，結果成班街坊就企晒喺度望住班消防做嘢，好彩大家都冇事平安落晒黎。聽番班記者講，原來係阿婆屋企個風扇短路起火。到咗十點半，終於都解封可以返番上樓。一上返去，我地二樓所有嘅單位都水浸晒，當然水浸啦，三樓火燭，消防啲水仲唔踴落二樓咩。跟住返房一睇，唉…枱面濕晒，最慘就係放係地下嗰部用黎剪片嘅電腦浸咗啦，著唔番機，要報銷喇，其餘兩部就好彩冇事。然後又上網睇番即時新聞都已經有報導到，之後妹夫又打電話黎話喺無線新聞台度見到阿仔同我地。今次真係好多嘢要處理囉，亦係人生中第一次遇上真正火警而走火警！